الثلاثاء، 27 أغسطس 2013

يا سارة...




إزيك يا سارة؟

عاوزة أقولك قبل ما تبدأي في القراءة إن الرسالة دي مش مرتبة ومش منتظمة كدا وهتحسي إنها داخلة كلها في بعضها وممكن ما يكونش لها علاقة بكِ خالص من قريب ولا من بعيد،بس قلت أفضفض معاكِ شوية..

قررتِ إنك مش هتكتبي تاني وتهورتِ ومسحتِ اللي كتبتيه ورغم زعلي إنك عملتي كدا إلا إني مقدرة اللي حصل لك..
مش سهل أبدًا تتقبلي تريقة حد على كلامك..أي كلام هتقوليه حد تاني بيتريق عليه أو بيزعق لك..مش فكرة لطيفة خالص إن حد يكون متحفز لكِ كل ما تتكلمي يقول عليكِ كلمة كدا ولا كدا..بيجبرونا نقفل بوقنا وبعدين ييجوا يشتكوا هو إحنا مش بنتكلم ليه؟!

أحيانـًا بفكر في معجزة الكلام كتير أوي،الكلام معجزة صدقيني!
المشكلة إننا كـبني آدمين مش مقدرين المعجزة دي،لو انت طبيب بيطري أو ربيت حيوان قبل كدا هتعرف قد إيه الكلام معجزة عشان تفهم..بس تفهم!
الكلام ممكن يفيد في الفهم وفي تبليغ الكلام وفي الرد والدفاع،المشكلة إن مش كل الناس فاهمة أهمية المعجزة دي وفائدتها فبيستغلوها غلط..بيشتموا في كلامهم على طول من غير ما يفكروا،بيتهموا الناس،بيقذفوا الناس بالباطل..إلخ إلخ 
وأكبر دليل إن الكلام معجزة،إن سيدنا عيسى -عليه السلام- اتكلم في المهد ورد على الاتهامات اللي واجهتها السيدة مريم وخلى المـُتهِمون يذبهلوا كداهو ..يعني معجزة ! 
وكون إن ربنا خلى مركز الكلام في المخ اللي هو بتاع التفكير برضو بالمناسبة يدل على أهمية التفكير قبل الكلام وإلا كان مركز الكلام في حته تانية مش لازم المخ.. لكن الناس ما بتبصش لكدا..الناس بتموت في السخافة وقلة الأدب والتريقة،لأن بالنسبة لهم غير كدا حاجة مـُريبة وغير طبيعية وغير تقليدية !

الفلسفة مـُرهقة يا سارة،مـُرهقة أكتر من الفيزياء،مفيهاش قوانين مفيهاش ثوابت..كلها منفدة على بعضها 
بس تستاهل.. 
المشكلة إننا بنستخدم الفلسفة غلط،بنستخدمها عشان نفهم الناس،وعمر ما الناس بتفهمنا.. أصلا الناس ما تتفهمش! 

عشان كدا عاوزة أقولك ما تبطليش كتابة،ما تبطليش تعبير...خليكِ باردة وانتي بتتعاملي مع الكتابة..الكتابة حلوة..حلوة أوي كمان..وهي معجزة برضو :) ! 

واعرفي إن البلابل المحبوسة ما بتغردش !

 فكري كتير أوي ..وما تجهديش نفسك وانتي بتدوري ع الفكرة،الفكرة عرفاكِ وهتيجي...بس مستنية تبطلي تبصي لآراء الناس في كتاباتك..انتي وبس..افهمي دا واشتغلي عليه..انتي.. وبس!






هناك 5 تعليقات:

  1. "ما تبطليش كتابة،ما تبطليش تعبير...خليكِ باردة وانتي بتتعاملي مع الكتابة..الكتابة حلوة..حلوة أوي كمان..وهي معجزة برضو :) ! "

    إتبعى ما يمليه عليك عقلك و قلبك و ﻻ تهتمى هناك كثيراً مثلك!
    فإستمرى و ستجدى كثيراً ممن يفهمونك, و لك كل التوفيق :)

    ردحذف
  2. هي قلة الأدب والتريقة..ده دليل علي حاجة واحدة هي نجاحك..تفتكري إنك تسعديهم وتقفي عن الكتابة!!!!

    ردحذف
  3. اسمعي كلام سارة :) بتقول كلام زي الفل أصلا :))

    ردحذف
  4. سارة :) انا طبعا مذبهلة من كلامك :)
    و معاكى 100 فى 100 :)
    بس الفكرة انى فى الاول طنشن كلام الناس بعد كده اتأثرت بيه حبة :)
    بعد كده دخلت فى مود اكتئاب :) بعد كده مسحت المدونة :(
    هى جت بالتدريج مش اكتر :( ربنا يسهلها و ارجع اعملها من تانى
    :) شكرا لتشجعيك يا سارة :)

    ردحذف
  5. استمري يا سارة مش لازم تبطلى كتابة
    كلام الناس والنقد مش لازم يأثر عليكِ إطلاقاً
    أكتبى كل اللى نفسك فيه مُش لازم يكون يرضى الناس
    أكتبى اللي كل اللى جواكِ واللى نابع منك :)
    كلام الناس أخر حاجة أكتبى لذاتك فقط ^_^

    ربنا يوفقك :))

    ردحذف